Five Things wey we observe as Manchester United knack Westbrom 2-1

Manchester United attackers Romelu Lukaku and Jesse Lingard bin tear net as the Red Devils knack Westbrom 2-1 for Hawthorns. As of yesterday, Man City bin dey top table with 14 points after dem demolish Tottenham 4-1, now United don cut the gap back to 11 points but our ‘we wan carry league’ matter dey God hand as we no sabi when Guardiola’s men go lose.

We wan talk about the five things wey we observe for the game:

The first thing wey we observe na say Man United bin no play well but dem manage win as Westbrom dey poor. For first half, the Reds bin dey clinical as dem score two goals sharply. For second half, we no even sabi wetin dey happen, whether na Mourinho tell dem say make dem no attack but the thing dull ehn. Na only God save us say Westbrom no equalize.

Another thing wey we observe na say Romelu Lukaku no dey celebrate again if e score and we no sabi the real reason. E bin score with one mad header against Westbrom but e no do like person wey tear net, e just frown. Whether e dey vess for United fans, or e dey respect Westbrom because e don play for them before.

Another thing wey we observe na say Jose Mourinho and Henrikh Mkhitaryan’s beef don continue as the Reds boss bin leave out the Armenian from hin Match Day squad again. We dey hear rumour say Mkhi go leave in January but we dey hope say na lie.

Another thing wey we observe na say Nemanja Matic fit be the signing of the season for Manchester United as e don put up another Man Of the match performance against Westbrom. I no know how Chelsea take sell us this guy self, e be like say their director dey shit for toilet when e sign the release papers.

The last thing wey we observe na say Jesse Lingard don become new creation in the past few games. E be like say e don dey watch Lionel Messi tapes. The Lingard wey dey play now, no be the same one wey start the season, e sure me say dem don upgrade hin brain from Windows 3.1 to Windows 10.


Wetin you think?

Fill in your details below or click an icon to log in: Logo

You are commenting using your account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s