Five Things wey we observe as Wasteful Man United draw 2-2 against Leicester

We bin dey think say Man United go get back to winning ways as dem wakka go face Leicester City but as match finish na 2-2 we see for scoreline. The thing wey pain pass, na say United bin concede for the dying minute. Na the second time wey dem don concede for dying minute this week, the first time na against Bristol City for EFL Cup.

Make i no lie, Man City don carry League jare. The gap na 13 points now and this our current team no fit catch Guardiola’s men. We sha wan talk about the five things wey we observe for the game:

The first thing wey we observe na say Marcus Rashford don cost us this game. We sabi say some other players like Lingard and Martial bin miss clear cut chances but the two clean chances wey Rashford spoil, for don seal the game. First Pogba give am ball, if say e give Lukaku, e for don seal game. Instead, e wan dribble keeper and e spoil am. Again, Lukaku give am ball, con make run, (E dey open, if say Rashford give am, e for dey one on one) but Rahford con turn back give Pogba ball. I no just understand.


The second thing wey we observe na say Manchester United players no get common sense. Everybody sabi say Smalling don wound, why dem no send am go front to attack? so e no fit cause calamity for us? instead, dem leave am make e be last man, and because of hin wound, e no fit prevent Leicester’s dying minute goal. E weak me.

Another thing wey we observe na say Paul Pogba bin try well as e pull strings. Even Romelu Lukaku try well. If say our other attackers play well, Lukaku for don chop like three assists today.


Another thing wey we observe na say Jose Mourinho get serious problem. Leicester collect Red Card and you dey replace Lingard with Herrera? You get sense? Make i no even talk more on the matter because e dey pain.

The last thing wey we observe na say Manchester United fit go trophyless this season if Jose Mourinho no talk to hin players. Many of our players dey selfish and e no go epp us.



Wetin you think?

Fill in your details below or click an icon to log in: Logo

You are commenting using your account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s