Five Things wey we observe as Manchester United draw 2-2 against Burnley


Na sad day for Red Devils fans as Manchester United draw 2-2 against Burnley. This match get as e be, because the scores be 2-0 in favour of Burnley for first half as Ashley Barnes and Steven Defour tear net. At Half-time, Jose Mourinho con replace Ibrahimovic and Rojo with Lingard and Mkhitaryan. The person wey save Reds yansh tonight na Jesse Lingard. I no fit remember the last time wey we win match self.

We wan talk about the five things wey we observe for the game:

The first thing wey we observe na say Manchester United’s first-half performance na error. Zlatan Ibrahimovic no dey ready at all and i no wan see am anywhere near starting line up. Dem go give am ball and e go dey jog like say the match no consign am. Before the game start, i think say na two strikers we dey use, but later i con realise say na only one striker (Lukaku) as Zlatan bin dey play No.10. Na the first half performance kill us today.

The second thing wey we observe na say Romelu Lukaku na passer by for the game. The guy no do anything thing, e just dey jump like Elephant up and down. Upon all the money wey we spend ontop am, na academy player still dey save our yansh because our record signing no wan receive brain. Hin positioning today na error. Striker wey no fit score when United need am, That one na striker?. The worst part about am na say, na him wey cause the first goal wey Burnley score. Upon say e big, e no fit defence set-piece.


The third thing wey we observe na say Manchester United bin play very well for second half after the changes but dem no dey clinical enough. But na only 3 shots on target wey United get for second half and na only Lingard dem come to. E manage score two but their keeper bin save one of them. Henrikh Mkhitaryan self ginger for the game and i no sabi why Jose Mourinho dey bench this guy. E dey pain me say we draw this game but e for worse if na defeat.


Another thing wey we observe na say Jose Mourinho no be special one again. The way United take start the season guns blazing, e be like say bullet don finish for their gun and Mourinho no dey help matters. The team wey e start with no tap and e bin wait until half time to make changes. Hin team no dey play fast enough. If say na during Fergie’s era, and United bin come out like dat for second half, dem for don win the game because e go don get bench striker wey fit enter to do the magic.

The last thing wey we observe na say Jesse Lingard na Manchester United’s best player this month. Match wey we think say we don lose, but e enter save our yansh. We just dey pray make Marcus Rashford find hin form because hin December form no be am at all. Oh well, we don jah from title race and we go soon drop to top four race if we no take time.


Wetin you think?

Fill in your details below or click an icon to log in: Logo

You are commenting using your account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s