Five Things wey we observe as Manchester United knack Derby County 2-0


dsz4rmxwaainbsrToday get as e be for FA Cup third round because Manchester United bin miss many chances against Derby County and as we bin dey expect say the match go end draw, na hin Jesse Lingard and Romelu Lukaku tear net, make am 2-0. Now the Red Devils dey the next round for FA Cup and we go like make dem carry the title.

Meanwhile, we wan talk about the five things wey we observe for the game:

The first thing wey we observe na say Marcus Rashford and Henrikh Mkhitaryan still dey struggle. Mkhi bin try small for first half but e bin misplace some passes wey almost make Derby score. Mkhi almost get assist for the game sha as e cross one ball wey Rashford head, wey knack side post. If say that goal enter, Mkhi for play second half but na no how God want am. Rashford on the other hand, e dey try but most of hin efforts no dey bring result. We no even sabi whether hin village people don swear am for am.

Another thing wey we observe na say Jesse Lingard, Paul Pogba and Ander Herrera bin dey outstanding for the Red Devils. Na the best game wey i don see of Herrera this season. The number of balls wey e steal from Derby players yakpa and e also epp for attack. E play many forward passes wey cause trouble for Derby backline. As for Pogba, e continue from where e stop against Everton, na fine performance wey e display. As for Lingard ehn, i no sabi the babalawo wey this boy go visit but the jazz wey the man give am, dey do wonders in the boy life.

Another thing wey we observe na say Luke Shaw gats find lesson teacher and the topic go be ‘How to cross a ball’. All the balls wey Shaw cross today na error. None find United player, E just dey cross am give Derby player like say e dey play for them. E try for back and e epp for attack but hin pullout na error.

Another thing wey we observe na say Derby Counter bin play defensive game but their counter attack na die. Na counter dem wan use finish Man United. The only thing wey save the Red Devils, na say Chris Smalling, Victor Lindelof and ko bin dey on their best P, so dem handle all the Derby threats wella.

The last thing wey we observe na say Sergio Romero gats learn hin work well. No be everytime you go dey punch ball like say you dey play volley ball. Sometimes, catch, other times punch. If no be for God, e for make us concede today as one of hin punches almost go where Derby player dey. Abeg o.



Wetin you think?

Fill in your details below or click an icon to log in: Logo

You are commenting using your account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s