Five Things wey we observe as Manchester United knack Stoke City 3-0


Jose Mourinho don break the ‘E no fit beat Stoke City’ Jinx as Manchester United knack Stoke 3-0 for Old Trafford on Monday night. The people wey score for the Reds na Antonio Valencia, Anthony Martial and Romelu Lukaku. Right now, United don reduce the gap between them and City to 12 points.

Meanwhile, We wan talk about the five things wey we observe for the game:

The first thing wey we observe na say Manchester United bin play very well tonight. Even though dem bin dey shaky for first-half as dem bin dey dash Stoke City chances, left right and Centre, all round na still good performance. For second half, dem play better even if na only one goal wey dem score. E pain me say the match no end 4-0 sha. But i still happy say we keep clean sheet o.

The second thing wey we observe na say Henrikh Mkhitaryan fit leave Old Trafford after all. We bin think say e go feature tonight because we spot am for Lowry Hotel with the rest of the players but Jose Mourinho con leave am out of hin final selection. To make matters worse, Mourinho self don confirm say Mkhi fit leave, say him no dey sure, but na why e no select am.


Another thing wey we observe na say Paul Pogba don show why Manchester United spend millions ontop hin head as na him wey dictate the whole game from start to finish. Almost all the chances wey the Reds see for the game, na through am. E even get two assists for the game. E remain small e for bag three assists self but Martial no fit finish the chance wey e give am. Na the best performance wey i don see of Paul Pogba lately. Make e continue like the abeg. Now e don get 9 assists for Premier League this season, E dey the same level with Kevin De Bruyne.

Another thing wey we observe na say our attackers bin dey sharp infront of goal tonight. Apart from Juan Mata, the rest bin dey clinical. Martial bin score mad goal for first half after Pogba give am sweet ball. Lukaku self score for second half, after Martial give am assist. As for Juan Mata, e just dey miss chances up and down. Make e go work on hin finishing because this one wey Sanchez dey come, na bench e go dey if e continue like this. But apart from hin finishing, Mata try sha.

The last thing wey we observe na say Man United don give themselves small hope for title race as dem don reduce the gap to 12 points. But i go honest, na big gap and the only way United fit win League na if City fall apart. Make we dey see sha. For football, anything fit happen.


Wetin you think?

Fill in your details below or click an icon to log in: Logo

You are commenting using your account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s