Alexis Sanchez bin train with Arsenal’s pikin team as Arsene Wenger banish am from senior team ahead of hin move to Manchester United.
The Arsenal boss believe say the move of the Chile man to Old Trafford, no go dey as painful as when Van Persie leave in 2012.
Man United never confirm the deal yet but we dey hear say Sanchez fir be the highest paid player for Premier League history, and Henrikh Mkhitaryan fit move go Arsenal.
Before, Wenger bin dey yarn say e no go allow that Van Persie incident repeat itself again but na the same thing wey happen as Sanchez don almost chook one leg inside Old Trafford.
“Our fans bin know say Sanchez no go extend hin contract,” na wetin Wenger yarn. “Dem don accept am but we no go lose because as Sanchez dey come, Mkhitaryan fit come.”
“We bin carry Van Persie when e bin dey struggle for Feyenoord reserve team and we don improve am. After we turn am to world class, e con leave, e painful gan.”