Na good day for United fans as the Red Devils knack Huddersfield Town 2-0 for Old Trafford. Na special day for the Reds, especially because Manchester United bin dedicate the game to the Munich disaster wey happen in 1958. The people wey score for the Reds na Romelu Lukaku and Alexis Sanchez. Right now, Jose Mourinho’s men dey 13 points behind leaders City (City bin draw 1-1 against Burnley). Manchester United dey also lead the chasing pack by 6 points and Liverpool go face Tottenham, while Chelsea dey face Watford.
We wan talk about the five things wey we observe for the match:
The first thing wey we observe for the game na say Jose Mourinho bin wan make big statement say e fit bench hin worldclass midfielder Paul Pogba, and na wetin e do. The midfielder wey e use na Scott McTominay and make i no lie, McTominay impress me sha. E play well. Him and Matic control midfield. Pogba con enter second half and e make mad statement as na him wey epp Manchester United find their second goal. That mad pass wey e give Juan Mata ehn. Na only am for the whole United team, fit throw that kind pass.
Another thing wey we observe na say dem wan kill Alexis Sanchez for us. Since the time wey we sign am, e be like say the number of tackles wey dey happen against am don increase. I dey thank God say e never woundjure sha as e dey use experience jump up, to avoid serious injury but e dey pain me say nobody don collect red card for their tackles. Very soon, e go dash person red card.
Another thing wey we observe na say the Referee na bastard. E dey wait make dem kill McTominay before e go blow foul. See clean foul wey suppose be penarity against Huddersfield as dem hit Scott enter ground but Ref commot eye, con say na drop ball. Na Thunder go fire am.
Another thing wey we observe na say Romelu Lukaku score goal today but na one of hin worst performances so far. The number of balls wey e lose today ehn, e tire me. For the most part, hin positioning inside box bin dey off. God save am as e score that first goal because na so so yab wey United fans dey yab am before the goal. E gats improve if e wan remain United No.9. That hin first touch wey fit send ball from Nigeria to Ghana.
The last thing wey we observe na say Manchester United don give up title race as dem dey concentrate on the teams wey dey behind them. City dey lead with 13 points and to be honest, dem don carry League. The koko na make Jose Mourinho finish second, buy world class players for summer, so we go fit compete next season for title.