Na sad night for United fans as dem bin dey expect goal galore from the Red Devils against Sevilla but na rubbish dem play. Na 0-0 wey the match end, if no be for David de Gea, United for lose the game self. The number of saves wey e make ehn, e plenty.
Now wey the match finish 0-0, e mean say wahala go dey if Sevilla score us first for Old Trafford. The Koko na say if we play well for Old Trafford, we suppose pieces them. I know say we go qualify sha, because we dey play well for our house.
We wan talk about the five things wey we observe for the game:
The first thing wey we observe na say Manchester United bin dey very disjointed and no be the first time wey e don happen this season. E be like say the arrival of Alexis Sanchez don confuse Mourinho and e don throway hin former game plan inside dustbin to please Sanchez. Must you play Alexis for Left-wing? Na by force??.
The second thing wey we observe na say Jose Mourinho na sturborn manager. Why e start Pogba for bench? why e no select Luke Shaw? Why Bailly dey bench? Why Martial dey bench? Why Rashford dey bench? Why Mata start today when you know say we no go too see possession? These na the questions wey dey on the lips of all Manchester United fans. We just dey pray make e get hin formation right against Chelsea dis weekend.
Another thing wey we observe na say David de Gea no be human being. If no be for am, United for lose like 3-0 today. If David de Gea come Nigeria, e sure me say dem go give am Chieftaincy title for Edo land. Out of all the saves wey e make, the best na the one wey e make before half-time.
Another thing wey we observe na say Scott McTominay dey play good football. Him na one of the few people wey impress me today with hin touches. Matic wey i bin expect to play well, bin dey play like mumu. Paul Pogba bin try for the game sometimes, but i bin expect more from am. Overall, McTominay na our best midfielder tonight.
The last thing wey we observe na say Romelu Lukaku dey isolated for front. I go bLame Alexis Sanchez partly, because the Chilean dey play too deep. Alexis Sanchez no sabi hin work. We no buy am to play deep but na there e go dey. E go leave Lukaku alone for front.