As Sunday don finally reach, na the clash of the Titans go happen on Sunday by 3:05pm as Chelsea dey wakka enter Old Trafford to face Manchester United. We go run live commentary ontop the game via our official twitter handle @ManUtdinPidgin.
The Red Devils bin dey siddon for Second position before, but as Liverpool hammer West Ham 4-1 on Saturday, e mean say the Reds don move down to Third position.
E sure me say Jose Mourinho and hin men go wan reclaim their second spot, so dem gats knack Chelsea today.
Out of dem two, na Chelsea dey on form pass as dem manage see 1-1 draw against Barcelona, while United bin struggle against Sevilla (0-0), if no be for David de Gea and hin winsh behaviour, United for don lose the game self.
Right now, we no sabi how Chelsea go set up but their formation go be 3-4-3 as usual. For their last match, their two strikers, Morata and Giroud bin dey bench while the people wey lead their attack na Hazard, Willian and pedro. Conte fit approach the game differently today. As for United, we go see if Mourinho go stick with hin Sanchez at left-wing formation, wey no dey work or e go change am. But this match fit see the return of Eric Bailly to starting line up after the rubbish wey Lindelof play against Sevilla. Also, we no sabi if Jose go play 2 or 3 midfielders. Most United fans no go wan see Pogba for defensive midfield as e no dey play well for there. Also, we no sabi who Mourinho go choose for Left-back, whether na Luke Shaw or Ashley Young. Make we dey see sha.
The United players wey go miss the game because of injury/fitness concern na Ander Herrera, Maroune Fellaini and Zlatan Ibrahimovic.
We dey predict 1-0 win to Manchester United over Chelsea.