Five Things wey we observe as Manchester United humble Chelsea 2-1: Lukaku don silence Agberos

Na good day for Red Devils fans as Manchester United bin come from behind to knack Chelsea 2-1. As match start, na Chelsea draw first blood with sweet counter attack as Hazard feed Willian and e bury am. Seven minutes later, better link up happen as Sanchez find Martial, wey find Lukaku and e con equalize. For second half, Jesse Lingard con burst their yansh again after better pull out from Lukaku. Right now, the Reds don dey siddon for second position with 59 points.

We wan talk about the five things wey we observe for the gaame:

The first thing wey we observe na say Chelsea bin start the match like say dem wan demolish Manchester United. Alvaro Morata knack bar self. I bin think say na slaughter as all United players dey shake up and down. As the match don balance well, United con dey overshadow Chelsea with possession. For second half, Chelsea no play shingbai and na because of how Jose Mourinho set up hin United side. The Blues no even see one single counter attack for second half. The thing frustrate Conte, sote e commot Hazard and e replace am with Pedro. E sure me say Pedro no play anything because all the passes wey e do today, go astray.

The second thing wey we observe na say Romelu Lukaku don silence hin critics, all the people wey talk say e no fit score for big match. The goal wey Lukaku score make brain but hin performance alone ehn, na the real reason why fans the hail am. The guy terrorize Chelsea’s backline. E get one mad run wey e do for second half, as e carry three Chelsea defenders dey run 100 metres race. If say e score dat goal ehn, the whole stadium for scatter. Na the Belgian’s best display so far in United jersey.

Another thing wey we observe na say our three man midfield bin work perfectly against Chelsea. Scott McTominay and Nemanja Matic bin do all the dirty work, as dem manage put Hazard and Willian inside their pocket for the most part of the game. Willian bin shine wella for first half, as e bin use hin pace worry our players, but as hin speed con reduce for second half, we manage chook am inside pocket. As for Morata ehn, apart from that hin shot wey knack bar, e dey almost useless. Paul Pogba bin epp well for attack, e school Kante wella. For second half, Pogba con dey run the show. Na Pogba wey instigate most of the United attack. The way e bin dey feed Martial and Sanchez ball make brain. I dey hope say Mourinho don learn ‘If you play Pogba high up the pitch, e go cause havoc.’

Another thing wey we observe na say our defence bin dey solid today. Chris Smalling and Victor Lindelof bin try. Lindelof bin almost make mistake wey for cost us for second half, as e no clear ball well but Smalling save hin yansh. Na Smalling’s best performance so far this season. Today, David de Gea bin no dey at hin best but our defenders still epp am. Maybe na because sun bin dey enter hin eye for second half, but our Spaniard bin almost dash Chelsea goal. We thank God say hin Village people’s plan no work.

The last thing wey we observe na say Jesse Lingard don make massive statement to Jose Mourinho with the winner wey e score against Chelsea. As Sanchez arrive for Old Trafford, e affect Lingo as the guy con dey warm bench when e dey on form. Now, as e take score mad header, give United massive three points, e sure me say Mourinho fit reason hin matter wella now.

Advertisements

One thought on “Five Things wey we observe as Manchester United humble Chelsea 2-1: Lukaku don silence Agberos

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s