Now wey Jose Mourinho and hin Manchester United team don silence Chelsea and their agbero fans after the 2-1 win for Old Trafford, we wan rate the Red Devils players:
1. David de Gea: Hin game today dey somehow. The goal wey Willian score, e suppose block as the ball bin pass through hin side but i no fit blame am because the shot dey hot. For second half, e almost mess up as the Sun bin dey enter hin eye but our defenders epp am clear ball. I go rate am 5.
2. Valencia: Hin game today dey alright. E no too overlap like that because of Hazard and Willian. E epp for defence, as hin wing no leak. I go rate am 6.
3. Victor Lindelof: E try overall. But e get hand for the goal wey Willian score because i no know how e no mark/foul Hazard before e do that assist. I no sabi how Hazard take turn am, e shock me. For second half, e almost dash Chelsea goal scoring chance when e no clear ball well but Smalling save hin yansh. I go rate am 5.
4. Chris Smalling: Na hin best performance this season. The way hin take chook Morata inside hin pocket for the most part of the game make brain. Na only once wey Morata beat am, for second-half, but the Spanish striker still delay things till all United men rush back, block road. E bin cover up for Lindelof. I go rate am 7.
5. Ashley Young: E no too play well attack-wise as most of hin crosses dey fly go where fans dey, sote Mourinho begin complain. I no understand hin game today as e no link up well with Martial self. E epp for defence sha. I go rate am 5.
6. Scott McTominay: E chook Hazard and Willian inside hin pocket. For first half, e bin chook Hazard inside hin pocket, then Mourinho con see say na Willian dey worry so e con assign am to Willian. I go blame am for the goal because e bin dey chase Willian then e con stop. If say e follow Willian, e for don stop their goal. All round, e try, e follow Jose’s instructions. I go give am 7
7. Nemanja Matic: E try wella, e steal ball from Morata plenty times. E also scatter Chelsea’s game plan as e bin foul Hazard and Willian when dem wan cause trouble. The guy guide our defence (Smalling and Lindelof). I go rate am 7.
8. Paul Pogba: Na one of hin best games so far this season, especially for the second half. The way e take run the show ehn. E dictate the game. This guy school Kante, sote the guy collect yellow card. Na only God save Kante, e for collect red card. Pogba bin epp for attack many times and e bin dey composed on the ball. When e bin collect ball, e hard Chelsea players to collect am back. I go rate am 8.
9. Alexis Sanchez: E bin start the game slow. At first, e bin dey play rubbish but later e con enter the game. E get hand for the goal wey Lukaku score. Na him wey give Martial the ball wey e take do assist for Lukaku. But the problem wey i get with am na say e no dey shoot. Dem go give am sweet ball inside box, instead make e wipe am first time score for me, e go wan control am, and na so e go take spoil ball. Maybe if hin confidence rise, e go dey try shot. E bin epp for defence as e bin steal ball from Chelsea players because of hin ginger. I go give am 6.
10. Anthony Martial: E bin start the game slow too. E no too show Chelsea defenders pepper but e manage do assist for Romelu Lukaku. I bin dey expect more from am. For first half, e bin dey epp wella during counter. For second half, e play rubbish. I go give am 5.
11. Romelu Lukaku: Na my Man of the Match be this. E tear net and e get assist. Also e cause trouble for Chelsea defenders. Hin hold up play make brain, hin link up play self tap. I go rate am 9.
12. Jesse Lingard: This guy na super sub. E try wella when e enter. The header wey e take score the winning goal, make brain. But i gats commend lukaku for hin pull-out. E make brain. I go give am 7. 13. Eric Bailly: I no fit rate am as e no play for long. E enter for Sanchez.