If person for tell me say i go see the comeback of the season tonight, i for doubt am but na wetin happen as Manchester United face Crystal Palace. Palace bin draw first blood in the 11th minute as Townsend score. For second half, Palace con double am as Van Aanholt score for the 48th minute. To be honest, at that point i think say na game over but Jose Mourinho’s men comeback knack dem 3-2. The people wey score for the Reds na Chris Smalling, Romelu Lukaku and Nemanja Matic.
Right now, Manchester United don regain their second position with 62 points, Liverpool dey 60 points, Tottenham dey on 58 points, while Chelsea dey on 53 points. i for talk Arsenal but sixth na their destiny. Meanwhile, we wan talk about the five things wey we observe for the game:
The first thing wey we observe na say Manchester United play total rubbish for first half. To be honest, na the worst half performance wey i don see so far. I no think say United get shot on target for the half self. Pogba and Sanchez bin dey do competition ontop who go play rubbish pass. Romelu Lukaku bin dey isolated. Scott McTominay self play rubbish and na why Mourinho remove am at half-time. The half bin dey frustrating to my eyes. If i go talk truth, Sanchez play rubbish for 90 minutes. At least, Pogba try for second half.
The second thing wey we observe na say Victor Lindelof and Chris Smalling bin fumble for defence tonight but Smalling manage redeem himself as e score for United. Dem two just dey do error after error. The worse na Lindelof self, the guy just dey shake up and down. At least Smalling bin score, but as for Lindelof, e just dey occupy space. We dey pray make Bailly return back to the Starting XI.
Another thing wey we observe na say Manchester United’s mentality for second half make mad brain. The kind ginger wey Rashford bring come the game, na wetin ginger our other players. As Smalling score ehn, my hope con reignite, i con get belief say we fit comeback. But if person for tell me say we go win, i for doubt am. Mourinho self bin take risks as e bin remove Young and Valencia, and e replace dem with Shaw and Mata. Na bold move and e pay am. Mata and Shaw bin impact the game wella. I gats hail Lingard sha because e bin start the game for Right-Wing, but e end am for right-back.
Another thing wey we observe na say Fergie-Time never die as The goal wey Nemanja Matic score for dying minute don re-ignite am. The goal sweet me, e remain small i for tear my shirt. The thing wey sweet pass for the goal, na the fact say we come from 2 goals down. Even though no be our best performance this season, na one of the best matches wey i don watch this season.
The last thing wey we observe na say Jose Mourinho don get serious headache. Whether e go drop Sanchez, because e no dey play well. Him na the worst United player for the Crystal Palace game. Whether e go start Rashford as e impact the game today. Where e go play Pogba against Liverpool. See ehn, i no wan know, I just wan make dem collect 3 points this Saturday. Make we dey see sha, we fit shock Premier League, knack Liverpool.