Players’ report card ontop Crystal Palace 2-3 Manchester United

The kind classic match wey happen last night as Manchester United come from 2-0 down to knack Crystal Palace Palace 3-2, no be for here. The thing wey sweet me pass na the fact say Nemanja Matic’s winning goal bin happen for dying minute aka Fergie Time. The three points bin dey very important for Red Devils Top four battle.

The next match wey Manchester United get na against Liverpool for Old Trafford on Saturday. Meanwhile, we wan rate how our player’s take perform against Palace:

1. David de Gea: For the two goals wey Palace score, i no fit blame am as no be hin fault. The first one, the shot wey Townsend play, deflect off Lindelof before e fly enter net. The second one, na one on one attempt wey Van Aanholt use destroy am. But e get one mad save De Gea make to deny Benteke when the match be 2-2. If no be for am, Crystal Palace for don win as the goal (If say the ball enter net) for don weak our players moral. I go rate am 7.

2. Antonio Valencia: Na him wey do assist for the first United goal. The chip wey e give Chris Smalling for the goal make brain. Hin composure before e chip am self make brain. E no too affect the game for first half and i no go blame am as e bin dey make mad runs for wing but our United players no feed am ball. I go rate am 5.

3. Ashley Young: E no impact the match. Na the same thing wey affect Valencia, wey affect am. Most of our United players bin no wan use wing attack for first half, na so so middle dem dey pass. E lose possession some times sha. Hin wing leak small for back. I go rate am 4.

4. Victor lindelof: This guy play beautiful nonsense. I no know why Eric Bailly still dey bench self. For the first Palace goal wey e deflect inside net, if say e dive like say e wan block ball, e for stop am but e do body like say hin dey fear. I go rate am 3.

5. Chris Smalling: E bin play rubbish for first half but e con up hin game for second half. E get hand for the two goals wey Palace score. The first one, e suppose mark Benteke but e dey follow am like escort. The second goal, him and Lindelof bin switch off as Palace play their quick freekick. I gats hail am because e get hand for the come back. The first goals wey e score bin dey very important. E also try for defence as e clear many balls with headers. I go rate am 7.

6. Scott McTominay: The guy play total rubbish for first half. No impact at all. I go rate am 2.

7. Nemanja Matic: E no play well for first half but e bin dey important for the comeback as na him wey score winning goal for dying minute. Hin second half performance na die, make i no lie. I go rate am 8

8. Paul Pogba: Him and Sanchez bin dey do competition ontop who go play rubbish pass for first half but the French international con up hin game for second half. I go rate am 6.

9. Alexis Sanchez: This guy no impress me at all. From start to finish, e play rubbish. Even when everybody con up their game, e still dey dash Palace ball. I go rate am 2.

10. Jesse Lingard: E no play well for first half but e epp for second half and e also sacrifice for the team as e bin start for right-wing, but e end the game for right-back. I go rate am 5.

11. Romelu Lukaku: E no do anything for first half as e no see supply. E cause havoc for second half. The guy no dey stingy at all with ball. Hin 23rd goal of the season make brain self. I go rate am 7.

Bench Warmers

1. Marcus Rashford: Him na confirm game changer. Na hin ginger wey ignite the United comeback. E try pass Sanchez by far. I go rate am 7.

2. Luke Shaw: The guy bin enter when Mourinho wan go for the match. E bin lose possession sometimes. E epp sha. I go rate am 6.

3 Juan Mata: The guy try well for United when e enter as e bin make some fine touches. I go rate am 6.5


Wetin you think?

Fill in your details below or click an icon to log in: Logo

You are commenting using your account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s