If person for tell me say Manchester United go humble Liverpool on Saturday, i for talk say na lie but na wetin happen as Klopp and hin side wakka enter Old Trafford. The Red Devils knack dem 2-1 as Marcus Rashford tear their yansh twice for first half, before Bailly don score own goal for second half.
The 3 points wey United collect, mean say dem don balance yansh wella for Second position as dem dey gap Liverpool and Tottenham with 5 points. Spurs fit reduce the gap to 4 points if dem knack Bournemouth on Sunday. Meanwhile, we wan talk about the five things wey we observe for the game:
The first thing wey we observe na say Marcus Rashford bin dey on fire today. Before today, e don tey wey Rashford start for Manchester United so we sabi say e bin gats perform well to make Mourinho trust am. But if person for tell me say e go score two goals, i for doubt am. The way Rashford take destroy Alexander for that first goal ehn, e send the guy go message, say make e go buy gala and Lacasera, then e con shatter Liverpool net. The second goal wey e score na jara. This one wey Rashford dey hot, if Martial come back, e go warm bench small.
The second thing wey we observe na say Manchester United bin defend wella. Everybody bin epp for Defence from Mata wey dey track back, to Smalling wey dey block all their shots with hin body, to Ashley Young wey chook Mo’Salah inside hin pocket. Apart from the own goal wey Eric Bailly score, Liverpool no see goal scoring chance. The match frustrate dem sote dey con dey find penarity. Thank God say Ref no give dem pena, spoil match.
Another thing wey we observe na say Scott McTominay and Nemanja Matic bin run things for midfield. Fashi say Liverpool bin see ball pass for the game, the koko na say dem no carry the possession wey dem see do anything meaningful. The way McTominay and Matic take close dem down make brain. The person wey dem frustrate pass na Chamberlain, sote the guy vess, collect yellow card. The way Pundits take hype Chamberlain before the game ehn, because the guy bin dey in fine form before e enter Old Trafford. But i gats hail Mourinho because as e shut out Chamberlain, e shut out the front three (Salah, Mane and Firminho).
Another thing wey we observe na Manchester United bin play well for first half, but dem no too play well for second half. If na defence-wise, dem try, i go hail dem but if na counter-attack/attackwise, dem play rubbish. Their game plan for second half na ‘hanging on’. Na God save United say Liverpool no equalize because as Rashford wakka commot, i no know who wan score for them. For first half, Lukaku bin dey involved in the game but i no know wetin happen to am for second half, e no con dey win Ariel balls again, e no chase balls down.
The last thing wey we observe na say Jose Mourinho na master tactician. E sabi hin work. Before the game, pundits dey yarn say Klopp go destroy United with hin attacking football, say Salah be like EPL Messi. But the way Mourinho take set up hin side to shut out Liverpool, make mad brain. Liverpool no play well at all, and na because of Mourinho’s tactics. Baba Special too much jare, e don shame hin haters.