Players’ report card ontop Manchester United 2-1 Liverpool

Manchester United don hold strong grip on second position after dem knack Liverpool 2-1 for Old Trafford. Na Marcus Rashford’s brace wey give the Reds Devils 3 points. For Premier League, na eight games remain, so na 24 points dey to play for. With the kind mad run wey United dey on, e sure me say Mourinho’s men go finish for top four.

We wan rate our players:

David de Gea: E for carry bed come pitch self because Liverpool players no too test am. Apart from the straight shots wey Firminho play for first half, i no dey sure whether e save any ball. I go rate am 6.

Ashley Young: E no go front as Mourinho bin assign am to man-mark Mo’Salah. If i go dey honest, e turn Salah to Salad as the guy no play shingbai. E also epp for defence as e make some important clearances. I go rate am 8.

Antonio Valencia: Him self no overlap as e bin mark Mane well. E no allow make Liverpool enter our defence. E do handball inside our penarity area but Ref no blow, thank God. I go rate am 6.

Chris Smalling: This guy shock me today, e impress me. Most of the shots Liverpool play, wey dey go on target, Smalling go just throw hin body for road, block am. E mark Firminho sote the guy turn Pius Ikedia. I go rate am 7.

Eric Bailly: Apart from the own goal wey e score, e bin dey solid defensively. Hin combo with Smalling make brain. I go rate am 6.

Nemanja Matic: E play well today. Ball no too dey hin leg but the times wey ball meet am, e use am well. Na only few times wey e dash Liverpool ball with hin sloppiness. E close down well. I go rate am 7.

Scott McTominay: This guy dey impress me wella. Ball no too dey hin leg but the times wey e see am, e use am well. E no panic as people like Mane, Firminho and Salah dey pitch. E bin chook Chamberlain inside hin pocket. At times, e bin slow game down by winning freekick, etc when United bin dey under pressure. Lastly, hin closing down on Liverpool players make brain. I go rate am 8.

Alexis Sanchez: E try sha, compared to hin previous performances. E almost get assist but Juan Mata’s bicycle kick bin no dey on target. For second half, e bin dash Liverpool ball some times. All round, e try. I go rate am 6.

Juan Mata: E epp for defence as e track back many times but i no too see hin handwork for attack. The bicycle kick wey e miss, if say e dey on form, e for control am, make am 3-0. I go rate am 6.

Marcus Rashford: This guy bin dey on fire. If say e play 90 minutes, e for get hat-trick. E don silence all hin critics with hin performance today. I go rate am 10.

Romelu Lukaku: E try for first half as e get hand for the two goals wey Rashford score, one of them na assist self. E bin treat Loveren like hin junior brother. For second half, e dey silent. I go rate am 7.

Bench Warmers

Maroune Fellaini: E bin enter for second half when Liverpool wan use pressure kill us. E epp United waste time. E remain small e for dash Liverpool penarity as e foul Mane inside box but Ref no blow. I go rate am 6.

I no go fit rate Jesse Lingard and Matteo Darmian as dem no play for long.

Wetin you think?

Fill in your details below or click an icon to log in: Logo

You are commenting using your account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s