Mourinho’s press conference ontop Manchester United vs Sevilla: If we win, we don try for Champions League

Manchester United manager Jose Mourinho don run press conference ontop the Champions League clash wey the Reds get against Sevilla. The Spanish club dey wakka come Old Trafford and the Reds boss go dey pray make hin side knack dem, so dem go fit wakka enter quarter final.

As una sabi say Paul Pogba bin miss the Liverpool clash injury, now the Reds boss don provide update ontop hin French midfielder:

“E train now but na after Paparazzi commot. I no sabi whether e dey fit but i know say e train after una commot.”

Mourinho ontop McTominay: “E dey ball. Everytime wey you see am, e dey learn, whether na ontop pitch o, or na outside. E no want make hin name dey for front of newspapers, e just improve so e go fit epp the team. The best way person fit improve na if e dey see game time”

Jose Mourinho don confirm say Anthony Martial dey fit to face Sevilla.

Marcus Rashford’s form don improve recently and Jose Mourinho don take style yab Frank De Boer as the guy dey chook mouth for wetin no consign am.

“I read somewhere where Frank De Boer, the worst manager for Premier League yarn say, e no dey good for Rashford to get coach like me,” na wetin Mourinho yarn. “If say Frank na hin coach, e for teach am how to lose because that guy bin lose every game e manage.”

“Gareth sabi how dangerous Rashford be, me and am dey reason alike. E dey play many games for us. E go start some, e go start from bench for others, e be 20 years. I dey happy with everything wey e dey offer. E go start every match? No nah, But i trust am.”

Jose Mourinho don reflect ontop the Sevilla game: “The game wey we get tomorrow dey important pass the one wey happen on Saturday. Saturday own na points and 24 more points still dey up for grabs, we go try finish second if e dey possible. Tomorrow, if you win, you advance, if dem knack u, u don jah.”

“Our team no be the best for the competition but i dey reason say if we fit reach the last eight ehn, anything fit happen. When you dey last 16, the journey still far but if you reach last eight, your nose go begin smell Semi-finals.”

“If we fit reach last 8, our head go begin swell say we dey among the best. Make we see wetin go happen, 2moro match go hard. Sevilla play Liverpool home and away and dem no lose. The way the first leg take end, e mean say the game dey wide open.”

“The most important match wey we play last season na the Europa League final. The victory wey we see for there, carry us enter Champions League. United na team wey suppose dey play Champions League every year.”

“If we win 2moro, we go enter last eight and na good thing o. Once we don enter quarter-final, we go begin dream say we fit win the trophy. But now, the problem na to scatter Sevilla.”


Wetin you think?

Fill in your details below or click an icon to log in: Logo

You are commenting using your account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s