Na the second warning letter wey we dey write to Alexis Sanchez since the time wey e move from Arsenal to Manchester United but the koko be say, we don tire. Again, we no go like make e end up like Memphis Depay or Di Maria.
Right now, i no sabi wetin e dey bring to the table for Manchester United. Even Di Maria no play dis bad when Ashley Young begin bench am. If we go rate everything wey Sanchez don do so far in United, e suppose dey warm bench with seatbelt. Right now him be our worst attacker as Rashford, Lingard, and Juan Mata better pass am.
The only thing wey e dey do game after game, na to increase hin number of ball possession wey e dey give away. Na only one goal wey e score and na Penarity rebound self. This guy don miss empty net self since the time wey e join and e dey play too deep for United. If e continue like this, e no go last for United, because e no dey add value.
Sanchez wey we bin think say go make our team stronger, don scatter the balance for the team. The fact say hin dey play mostly for left-wing, don spoil chance for Rashford/Martial wey dey hot for there.
See ehn, make Mourinho dey bench Sanchez, e don do.