Some evil people bin dey pray make Man United lose against Brighter Grammar so dem go banter us but the God wey i dey serve, don shame dem tonight as Jose Mourinho’s men knack Brighton 2-0. The people wey score for the Reds na Romelu Lukaku and Nemanja Matic.
Now Manchester United don advance to the FA Cup Semi-Final sha. Meanwhile, we wan talk about five things wey we observe for the game:
The first thing wey we observe na say Jose Mourinho dey bully Luke Shaw unjustly. For first half, Shaw bin try. If say i wan rate am, i go rate am like 5/10 but Mourinho con bench am at half-time, and e con put Ashley Young wey play like complete moron. If i go rate Young’s performance, e go be 2/10. But after the match, na Luke Shaw wey Mourinho blast, say the guy play total rubbish. I no go blame am, na Shaw wey humble himself so e fit do am anyhow. E no fit try that kind rubbish with Zlatan or Pogba. Dem go change am for am.
Another thing wey we observe na say Manchester United no play well today but dem manage score two goals. The game bin dey boring. The first half, dem just dey hold possession but dem no dey attack. For second half, dem dey dash possession away. Na God save us say Brighton no score with their chances self.
Another thing wey we observe na say the only person wey play well tonight na Nemanja Matic.. Na the worst display wey i don see of McTominay so far this season but how e take cover up for hin mess up, na the fact say e epp defensively. But McTominay get hand for Brighton giveaway (E dash ball away sote i tire). If no be for Matic, we for no win today, E bin get one goal and one assist.
Another thing wey we observe na say our attackers Anthony Martial, Juan Mata and Jesse Lingard no play well today. The worst out of dem na Lingard self, e no play shingbai, e just dey run up and down, dey chase shadow. E be like say as Jena Frumes leave am, she carry hin brain commot.
The last thing wey we observe na say Jose Mourinho no get sense. This one wey e dey criticize hin players publicly, hope say e no go back fire sha. If say e don train dem well since when season start, dem for dey gel now. E con dey do like say no be hin pattern dem dey play. You no fit teach people attacking football overnight now.