Now wey Manchester United don dey cement second position for Premier League table with 71 points after dem knack City 3-2 on Saturday, we wan drop Players’ repord card:
David de Gea: The goals wey City score United, nothing wey e go fit do to stop am, but na hin poor clearance wey cause the second goal. E bin make some outstanding saves wey deny City goal. The best save wey e make na the one wey e make to deny Aguero for second half. I go rate am 7..
Chris Smalling: E bin play beautiful nonsense for first half as na him wey cause the first goal wey City score, as e no fit mark Kompany well. E step up for second half, e make mad tackles, intercept balls, and e con crown am with the winning goal. I go rate am 8.
Eric Bailly: E no play well for first half. E bin allow make City see many chances for the half but e con step up hin game for second half, but e no epp for attack(comeback). I go rate am 6.
Antonio Valencia: Na hin poor clearance wey lead to the corner, wey City use take the lead. E bin no dey the game at all for first half as na him wing wey Sane use wan destroy us. But e con step up for second half defensively. E no too epp for attack. I go rate am 6.
Ashley Young: Na one of the people wey ball pass for United. The number of tackles wey e make, wey deny City goal plenty. Even the error clearance wey e do for first half, wey deny goal scoring chance for Sterling (Some bad belle people go talk say na hand ball). E sweet me as Young deny Aguero with mad tackle for 18 yard box but some evil people go talk say na penarity. I go rate am 8.
Nemanja Matic: E bin struggle for first half as most of hin passes bin dey go astray but e improve for second half as e guide for our defence wella. I go rate am 7
Ander Herrera: Na confirm mumu for first half with no impact but e ball fire for second half. Na him wey do assist for the first goal wey Pogba score with one mad chest flick. I go rate am 8.
Paul Pogba: The guy bin dey confused for first half as City players no give am free space to affect the game. For second half, e carry Manchester United ontop hin back as e get hand for the comeback as e score two goals. I go rate am 9.
Jesse Lingard: Una sabi as spicing be ontop cake? Na how Lingard take be throughout the game for Manchester United. Na space is come occupy. I go rate am 5.
Alexis Sanchez: All the rubbish wey e do for first half, the only thing wey remain make dem dash am City jersey. E be like say Mourinho threaten am at half-time because e bin get two assists and e get hand for the first goal self. I go rate am 8.
Romelu Lukaku: For first half, e dey isolated. When the team con gel for second half, e dey spoil ball. E try small for hold up play. I go rate am 6.
Rashford, McTominay and Lindelof no too impact the game as dem enter late. I no fit rate dem.