Five Things wey we observe as Manchester United dismantle Spurs 2-1 for FA Cup Semi-final

The way i don shout today ehn as Manchester United knack Spurs 2-1 for FA Cup semi-final, no be for here. Na Tottenham wey score first through Dele Alli, but Alexis Sanchez con equalize from cross wey Pogba play. Then Ander Herrera con double am for the Red Devils for second half. Right now, Jose Mourinho don put all the pundits wey dey doubt am to shame, as e carry United reach the FA Cup finals. Another thing wey sweet about this win, na the fact say Liverpool bin draw 2-2 against West Brom for League. E mean say the Red Devils dey lead dem with three points.


We wan talk about the five things wey we observe for the game:

The first thing wey we observe na say Manchester United bin start the game slow. The way Tottenham take start the match ehn, like say dem wan kill us. Chance after chance but United defenders dey clear am. Serious fear bin catch me, e remain small i for piss for body self. But as the game con dey go, United con balance yansh well, begin play better ball. But the goal wey Spurs score, na like film trick. E shock me because na one mad ball wey dem fling from defence, start the process for the goal. Na for Ashley Young wing wey e happen but i no sabi where the guy go, e just leave Pogba for there. Na God save am say we win today, else fans for blast am.

The second thing wey we observe na say Jose Mourinho bin demand big performances from hin big players (Alexis Sanchez and Paul Pogba) and dem no let am down. I know say na Sanchez wey win Man of the match, but e sure me say e win am by small margin as Pogba ball fire. The way dem two take carry the match for their head ehn. If say Lukaku dey on form, we for don win by three goals.

Another thing wey we observe na say Phil Jones and Chris Smalling bin chook Harry Kane for their pocket. The way dem take rough handle the guy ehn. Dem turn am from Kane to broom stick. The guy no see anything play. But make i no lie, Spurs bin see some dangerous chances, like when Eric Dier’s shot fly knack side post for first half. Na God save us o, if say that ball enter net, the match for dey different.

Another thing wey we observe na say, the only two people wey no try attack-wise na Ashley Young and Antonio Valencia. E be like say Mourinho give dem order, say make dem no overlap. Sometimes, Valencia go carry ball, wan run to attack but when e remember Mourinho’s instructions, e go make U-turn and e go do back-pass. But for defence wise, dem try.

The last thing wey we observe na say Jose Mourinho na the special one. Fashi wetin all these pundits dey talk. Apart from Man City, all the other managers wey dem dey compare am to, e don humble them (Conte, Klopp and Poche). For the past seven weeks, United don beat almost all the top sides wey dey Premier League. The only bad result wey e do this season, na the Sevilla defeat.



Wetin you think?

Fill in your details below or click an icon to log in: Logo

You are commenting using your account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s