Five Things wey we observe as Manchester United knack Arsenal 2-1: Na Fergie time winner

Na the perfect send off wey Jose Mourinho give Arsene Wenger for Old Trafford as Manchester United knack Arsenal 2-1. Na the Red Devils draw first blood as Pogba tear net, then our former boy Mkhitaryan con equalize for second half as e dey try prove point to Mourinho. But wetin wey sweet me na the Fergie-time winner wey Maroune Fellaini get for the 92nd minute. As everything take be, Manchester United don qualify for next season’s Champions League and dem don almost seal up second position for Premier League table as Liverpool bin draw 0-0 against Stoke on Saturday.

We wan talk about the five things wey we observe for the game:

The first thing wey we observe na say, Arsene Wenger mind dey for the Europa League game wey e get against Atletico Madrid. So, e rest many of hin key players and e start many children against United today. Make i no lie, hin children try, especially Niles. Their defence bin dey solid for the most part. The only person wey con dey trouble their defence na Fellaini (when e enter)

The second thing wey we observe na say Manchester United no play well today but dem deliver. The Red Devils game dey very slow today. I bin dey expect make dem dismantle Arsenal but no be wetin happen. For the most part, the match bin dey pain me. The goal wey Arsenal score na defensive error as Herrera and Matic confuse, leave ball wey dem suppose play. I sha thank God say we win so people no go yab Mourinho.

Another thing wey we observe na say we need full-backs wey sabi cross accurately. The way Young and Valencia dey cross some times ehn, e fit make person vess. Their cross na ‘any where belle face’. Na only person like Fellaini fit utilize am. The thing wey dey pain me pass na say Lukaku sabi cross pass Valencia. Make Valencia go work on hin pull-out sha.

Another thing wey we observe na say Paul Pogba don prove hin critics wrong with another mad performance but Anthony Martial don dey fall my hand. Na Pogba wey run the show for midfield as e dey epp to push attack from midfield. The fact say e score sweet me. As for Martial, e go dribble everybody and e go con pass to Arsenal player. E do am more than one. The only major impact wey e get when e enter, na when e cross ball to Fellaini, but iroko tree header knack post.

The last thing wey we observe na say Manchester United fans no wan make Arsene Wenger retire. The fans for stadium dey sing hin name self as we don too knack Arsenal for Old Trafford. This season, Jose Mourinho don knack am Home and Away. Na the first United manager since Fergie wey don achieve am.

Advertisements

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s