Five Things wey we observe as Manchester United draw 0-0 vs West Ham: We don finish second

Manchester United don confirm their second position for Premier League table after dem draw 0-0 against West Ham. If i go dey honest, the match dey dry but na wetin Mourinho want. Our last match for Watford go be like jara and i dey pray make Baba Special use people like Gomes or Chong.

Anyway, we wan talk about the five things wey we observe for the game:

The first thing wey we observe na say Manchester United bin try for first half but dey bin dey flat for second half. The times wey dem suppose counter, dem go just dey do back-pass like say dem no wan score. E sure me say Mourinho tell dem at half-time, say make dem no attack with force.

The second thing wey we observe na say e fit be the end of the road for Anthony Martial in Jose Mourinho’s team. Upon say Lukaku dey injured, e no consider am. Him and Rashford bin start for bench but na Rashford wey play like 18 mins. Martial bin warm bench for 90 minutes. This one wey clubs like Chelsea, Juventus, etc wan buy am, the guy fit vess, pack hin load commot.

Another thing wey we observe na say if no be for Phil Jones, David de Gea for no keep clean sheet today. The number of important blocks/clearance wey Jones do ehn, if no be for am, West Ham for don score us. That ball wey Arnatovic fling for Carroll, na Jones save us with hin headed clearance.

Another thing wey we observe na say Jose Morinho fit overhaul the squad this summer if e wan compete with Man City next season. I know say United finish second, but the gap dey too much. The thing wey pain, na the fact say United dey drop points against small teams. We hope say e go buy the right players sha.

The last thing wey we observe na say Manchester United dey very flat with Romelu Lukaku. For the matches wey e no play this season, e dey obvious. We bin also miss hin presence today. If say e dey, we for score.


Wetin you think?

Fill in your details below or click an icon to log in: Logo

You are commenting using your account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s