Who go replace Michael Carrick next season? Na the question wey dey ontop everybody’s lips as dem go like make Manchester United carry Premier League title next season.
Some people go talk say na McTominay but if i go dey honest, e no fit lead us to the trophy as e no get winning mentality yet. E sabi play ball but many things dey wey e gats learn first, before e fit become top midfielder. E go make sense if United fit buy two world class midfielders, so dem fit epp us win League. Dem go also epp McTominay as dem go dey show am the things wey dey missing from hin game.
Some people go talk say make we believe in Maroune Fellaini but if i go dey honest, the guy dey like PHCN light for Nigeria, na once in a while, e go dey on form. Wetin wey pain me pass about am, na say e don dey proud. This one wey e don become injury prone, make e kukuma leave.
Some media houses dey link us with Toni Kroos but i no dey sure whether Real Madrid go sell am. Others dey link us with Fred. Fred be like person wey go struggle for hin first season.
See ehn, i no sabi wetin we dey miss for our midfield but i dey behind Jose Mourinho. Anything wey e wan do, make e do.