I suppose dey vex but i dey alright because i fit beat my chest say we try, with the way Manchester United display against Chelsea. But their ginger no fit produce goal and na how Chelsea take win FA Cup. Even if e pain me, if dem ask me to choose between Champions League place and FA Cup trophy, i go choose Champions League. Anyway, the season don round up for us and our attention don turn to the World Cup.
We wan talk about the last five things wey we observe for our 2017/18 season:
The first thing wey we observe na say Jose Mourinho bin make the wrong decision as e start Rashford ahead of Lukaku. Even if Lukaku no dey 100% fit, we for manage like that. The way Rashford take flop for second half ehn, e tire me.
Another thing wey we observe na say Phil Jones don cost us the FA Cup title. Na hin stupid mistake cause the goal right from how e take position himself before Hazard control the ball. I no know why e make the tackle self, e for just stay on hin feet. Na him i go blame partly for the defeat.
Another thing wey we observe na say Manchester United no play well for first half but dem try wella for second half. But all their pressure no epp as Conte and hin Chelsea team park Apapa warf container for their post.
Another thing wey we observe na the people wey ball pass for second half. Smalling dey among dem. This guy try wella as e manage keep Hazard silent. Pogba control game for second half as e push attack many times. Herrera self dey fling passes like say e be Iniesta. I also wan hail Matic, e try wella.
The last thing wey we observe na say this match don reflect our season. Our players dey behave like robots wey dey play according to instructions. But the times wey Mourinho free dem, dem play well.