Na the last Player’s report card wey we go drop this season as Manchester United season don finally come to and end. The Red Devils bin lose 1-0 against Chelsea as Hazard use penarity burst our yansh.
We wan rate our players ontop how dem take perform today:
David de Gea: i go rate am 9 as e try wella to deny Chelsea more goals. If no be for am, the match for end like 2-0. I no go blame am for Hazard goal, na pena.
Antonio Valencia: I go rate am 7. E dull game for first half but e con improve for second half as e dey make devilish runs behind Chelsea backline. But Rashford dull am as e no dey stay inside box.
Ashley Young: I go rate am 7. Hin pull outs make brain. But our attackers no fit use am well. E cause trouble attackwise and e also epp for defence.
Phil Jones: Na the mumu of the day. Na him wey dash Chelsea free goal. Who send am message? I go rate am 2.
Chris Smalling: Him na our best defender today. E no do mistake for the game and e keep Hazard inside hin pocket for second half. I go rate am 8.
Ander Herrera: E quiet for first half but e con step up for second half as e run show alongside Pogba. I go rate am 8.
Paul Pogba: E be like vanishing spray for first half apart from hin counter before half-time. E man up for second half but e miss some big chances like the free header. I go rate am 7.
Nemanja Matic: Na our Best Midfielder of the day but luck no dey hin side. I go rate am 9. E control game.
Jesse Lingard: E dey think of Jena Frumes for first half but e raise hin game for second half before Mourinho remove am. I go rate am 6.
Alexis Sanchez: E just dey form activity up and down but e no influence the game. I go rate am 5.
Marcus Rashford: Na error. 2
Anthony Martial: E enter like say e wan change the game with hin fast touches. Later, e con dey spoil ball. Most of the shots wey e play, dem hit Chelsea player. I go rate am 6
Romelu Lukaku: E try for hold up play but our players no locate am inside box. I go rate am 5.
Juan Mata: E dey think about hin blog. I go rate am 3.