Manchester United don round up their pre-season games after dem lose 1-0 against Bayern Munich for Allianz Arena. The person wey score for the German champions na Javier Martinez, na header e use burst our yansh (De Gea). E for be 2-0 as Robben bin score after Agbalagba replace De Gea for our post but na God save us from shame as linesman cancel am (offside).
The Premier League go return this Friday night and United go welcome Leicester City to Old Trafford so we wan sharply talk about wetin we observe for the Bayern game.
The first thing wey we observe na say Jose Mourinho no do well tactically, e fall my hand for this game. I bin dey expect make the team show people say dem dey ready for Premier League but the only thing wey dem do for 90 minutes na to defend an hand-over ball back to Bayern Munich. The Red Devils no even get shot on goal, not to talk of shot on target. For second half, na only once wey i see Bayern goalkeeper.
The second thing wey we observe na say Marcus Rashford don upgrade hin jersey number from No.19 to No.10. Even if e no play well against Bayern, we dey hope say e go do justice to that number as na senior men dey wear am. We believe say e go deliver sha.
Another thing wey we observe na say Jose Mourinho fit don banish Anthony Martial from hin team and e no good. Upon say Martial bin return back to Carrington on Friday, the United boss no carry am go Germany. I even hear say e wan use am as swap deal for Willian.
Another thing wey we observe na say the Real David de Gea don return, no be the Aba-Made version wey follow Spain go World Cup. If no be for am, e for be 3-0. E bin make some good saves. For the goal wey dem score am, i go fit blame am. Na defensive error.
The last thing wey we observe na say Manchester United never improve from wetin we see last season, if we no buy before the transfer window close on Thursday, we fit fall apart when we face strong team.