If person for tell me say i go witness the worst Manchester United game ever, i for doubt am, but na wetin happen as we face Brighton for Amex Stadium. na 3-2 wey e end but if i go dey honest, the goals wey we score (Lukaku and Pogba) na fluke. Lukaku’s own na header, while Pogba’s own na when match don already finish, wey we see penarity to cover our shame small. Our next game na against Tottenham for Old Trafford, meanwhile we wan talk about the five things wey we observe for the match today:
The first thing wey we observe na say Eric Bailly and Victor Lindelof combo na total error. This game don expose them. The person wey worse pass na Bailly, almost everything wey e do today na calamity, na him wey make us lose. The first Brighton goal, e get hand, the second, e get hand. The third, na him wey cause the pena. E no go suprise me if Chris Smalling or Phil Jones replace am for this team.
The second thing wey we observe na say United play rubbish from start till finish. Attack na error, Midfield self na error and defence na total error. For attack, Lukaku bin miss one clean chance before Brighton’s first goal. Our midfielders Fred, Pereira and Pogba no play anything at all, dem three be vanishing spray. Apart from the pena wey Pogba score, e dey useless.
Another thing wey we observe na say Jose Mourinho get blame for the defeat as na him wey set the team. na him wey dey give the players’ instructions self on how dem go play. For first half, dem dey in shambles. For second half, even though dem dey hold ball, dem no worry Brighton keeper at all. Fear no catch Brighton players at all for the game. Mourinho fall my hand today.
Another thing wey we observe na say Anthony Martial dey overrated. With the way fans go take dey scream hin name ‘Martial FC’, You go think say e go deliver, especially now wey Alexis Sanchez bin get small woundjure, but na rubbish wey e play throughout. Apart from that one chance wey e miss, e no play shingbai.
The last thing wey we observe na say Wahala dey. Last season, wetin save us na say Chelsea bin dey in trouble. Now wey dem dey do well, and e be like say Sarri sabi, i hope we no go miss out on top four.