Manchester United get very important match against Burnley on Sunday, so manager Jose Mourinho don provide update ontop the matter. The Red Devils bin lose 3-0 for Old Trafford in their last match and fans dey pray make dem beat Burnley so dem fit rejoice small.
The Reds boss don reflect on the defeat vs Spurs: “We bin make some mistakes and na wetin dem use punish us, but the players try, and i reason say the hailing wey fans dey do, na for them, no be for me.”
“Nobody fit tell me rubbish, make i school una. Last season, we do well. I don grade myself. Na me be one of the best managers for this world,” na wetin Jose yarn. “I don carry many trophies. na me be the only manager wey don win for Spain, England and Italy.
Mourinho don praise hin left back Luke Shaw: “The guy don dey use hin brain wella ontop pitch. We dey happy for am and i dey feel say e make sense say England don call am up. The guy ball fire for our first three games.”
Meanwhile, E don confirm say Phil Jones go miss the Burnley match on Sunday, The guy get biscuit bone for hin leg. Also, e confirm say Diogo Dalot and Sergio Romero don come back from wound. E also talk say dem go play for our United U23 vs Stoke tonight.