As we dey happy ontop wetin Manchester United do Watford for their backyard, as dem knack dem 2-1, we wan sharply rate all our players ontop how dem take perform for Vicarage Road.
David de Gea: I go rate am 10/10 for hin performance against Watford. If no be for am, the match for end draw as Watford bin see one mad scoring chance for dying minute, but na hin World Class save wey give us three points.
Antonio Valencia: E try for first half but dey con dey dribble am up and down for second half. I go rate am 5/10.
Ashley Young: E try attack-wise as e get hand for the both goals. I go rate am 7/10.
Chris Smalling: This Guy impress me wella. E try for defence and e con crown hin good performance with World Class finish. I go rate am 9/10.
Victor Lindelof: E try for first half but e con dey shake for second half as pressure plenty. I go rate am 6/10.
Nemanja Matic: E try wella for the game but i no know who send am go message, wey e collect red card. I go rate am 7/10.
Paul Pogba: E be World Class for first half but hin performance con drop for second half. But the guy try as e bin give Romelu Lukaku many sweet balls but the guy first touch mess am up. I go rate am 7/10.
Maroune Fellaini: Na our best midfielder of the day. E dey make our defence stable and e dey also help for attack. I go rate am 10/10.
Jesse Lingard: E try sha, but e lost for second half. I go rate am 6/10.
Alexis Sanchez: E just dey frustrate up and down for the game but e bin see one good chance but Ben Foster deny am. E score self but na offside. I go rate am 5/10.
Romelu Lukaku: E score sha and hin hold-up play make sense but e gats work on hin link up play and first touch. I go rate am 7/10.
Martial: The guy enter match like say e no consign am, E bin see many chances to prove himself but i no sabi where hin pace disappear to?? Mourinho self bin dey vex for am. I go rate am 4/10.
Eric Bailly: E just enter to mark attendance.
Scott McTominay: E no impact the game. I go rate am 4/10.