Manchester United boss Jose Mourinho don provide update ahead of hin side’s Champions League opener against Young Boys.
“We bin decide say make Antonio Valencia no come as e fit woundjure if e use that hin knee for artificial pitch,” na wetin Jose yarn. “Luke Shaw dey play tomorrow sha and other men like Diogo, Young and Darmian dey ready to play.”
“I know say dem dey use artificial pitch for their house and na rubbish but no be excuse for bad performance.”
“Everybody sabi say things dey different. We dey Switzerland, na here dem born that winchy winchy tennis player Federer. E sure me say the games wey e play for here, e no dey happy as e gats win ontop fake grass.”
“I dey reason say we dey improve, our team dey balanced now and we dey ready to battle anybody for three points,” Jose still dey yarn. “We dey create many chances, we don change how we dey attack as we don find how to protect ourselves for back.”
“I dey happy but no be today e start, i bin dey happy after Tottenham knack us as i bin see the hunger from my players. We don do well for two away matches, back to back.”
Lastly, Jose Mourinho don confirm say Marcus Rashford go start tomorrow against Young Boys for Champions League.