Today na good night for United fans as the Red Devils bin come from two goals down to knack Newcastle 3-2 for Old Trafford Stadium. At Half-time, the scoreline na two in favour of Newcastle and if I go dey honest, many people don commot mind from the matter. But Mourinho con ginger hin boys, na how dem take win tonight. The people wey score for the Reds na Juan Mata, Anthony Martial and Alexis Sanchez. Na good three points as the Red Devils dey siddon for eight position with 13 points.
We wan talk about the five things wey we observe for the game:
The first wey we observe na say Manchester United bin dey in shambles for first-half. The goals confuse me self, I just say make I go piss, I come back, see say Newcastle don score two quick goals. For the goals, I go blame Ashley Young. I no sabi wetin dey do Eric Bailly, e just dey defend today like say the match no consign am, na why Mourinho remove am for Juan Mata.
Secondly, na Scott McTominay’s worst game for Manchester United. At first, e bin flop as e partner with Pogba and Matic for midfield, later e con flop pass for defence as e just dey shake for back, dey give Newcastle opportunites. E frustrate Mourinho sote e chop bench at half-time.
Thirdly, Juan Mata, Paul Pogba and Anthony Martial bin play their life out for second half. The person wey I go hail pass na Pogba as e play defence, midfield and attack for one match, and e still manage get assist. E still manage collect midfield for Newcastle hand for second half.
Fourthly, Romelu Lukaku na still pant for front, but hin crosses dey make brain and e no go bad if e play RW for United. As Sanchez bin enter the game, na like striking role e play, along side Fellaini, na wetin make am see winning goal.
Lastly, Manchester United fit don survive shame this week but na their clash against Chelsea go determine the direction wey dem dey go. If dem dey improve, or if dem dey backslide.