Five Things wey we observe as Manchester United knack Bournemouth 2-1: Na Fergie time winner


If person for tell me say i go dey happy after the first 30 minutes against Bournemouth, i for talk say na lie but na wetin happen as Manchester United come from one goal down to knack Bournemouth 2-1.

The people wey score for the Reds na Anthony Martial and Marcus Rashford. Right now, the Red Devils dey on 20 points, but dem still dey for eight position. The koko na say dem dey reduce the gap between dem and top four. If United fit beat City next week, na game on for Top four race.

Anyhow, make we talk about the five things wey we observe for the game.

The first thing wey we observe na say Man United no play shingbai for the first 30 minutes in first half. E be like say their brain dey sleep. Na wen Martial score, the team con improve small. But all round, the first half performance na dead. Apart from that Everton game, the few games wey United don play, their first half dey poor.

The second thing wey we observe na say Manchester United get serious defensive problem. Today, the people wey mess up pass na Chris Smalling and Nemanja Matic. Dem two just dey spread yansh like ashawo for first half. Thank God say Bournemouth no score pass one goal, else e for be story for the gods.

Another thing wey we observe na say Anthony Martial don continue hin mad form as e manage score again today. Apart from the goal wey e score self, e ball fire. E play hin wing wella and e cause trouble for Bournemouth defence. We hope say e fit score against Man City, e go prove say e don mature gan gan.

Another thing wey we observe na say the midfield trio of Pogba, Fred and Matic na error as dem allow make Bournemouth collect midfield. I know say Fred dey tackle, and e dey run wella, dey block, but e no dey play well with Pogba and Matic. As Herrera enter second half, e con dey link up with Pogba wella. But e pain me say Herrera miss two chances, wey e suppose score.

The last thing wey we observe na say Jose Mourinho bin dey tactically sound today. All the substitutions wey e make for second half dey effective. E sure me say e go sweet Mourinho belle as Rashford take score winning goal, as na one of hin subs. Make we dey see wetin go happen against City. Lukaku fit return back to the Line Up? or abi e go warm bench? Make we dey see sha.


Wetin you think?

Fill in your details below or click an icon to log in: Logo

You are commenting using your account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s