As we still dey celebrate the mad win against Juventus for Turin, we wan sharply rate our United players ontop how dem take perform against Juve:
De Gea: I no go blame am for Ronaldo’s goal as na world class finish. E bin make some saves to keep United in the game. I rate am 8.
Lindelof: Na him wey cause the Ronaldo goal, as e play am onside but overall, e impress me. E dey tight at the back. I rate am 7.
Chris Smalling: E try as e manage keep Ronaldo at bay most times, e no allow make e bully am. I rate am 7.
Ashley Young: Na him wey get hand for the winning goal, as na hin freekick wey Fellaini head, wey tremble Juve defenders. I rate am 7
Luke Shaw: E try sha but e no help for attack like that. But e bin make some good overlapping runs. I rate am 6.
Ander Herrera: The guy try to cover our defence yansh as e no allow make Juve see chances. E for get one clean chance but Juve foul am. I rate am 6.
Paul Pogba: Make i dey honest, na one of our poorest players for the pitch. E just dey hand over possession. I rate am 4.
Nemanja Matic: Na average game wey e get jare. But e improve sha, compared to hin previous games. i rate am 5.
Jesse Lingard: This guy no impact the game at all. E just dey fill up space. I rate am 5.
Alexis Sanchez: This guy dey collect 400k every week but e dey put in 10 pounds effort.
Anthony Martial: Na him ginger wey bring United back into the game as e send Cuadardo go message sote the guy confuse. i rate am 8.
I go rate Juan Mata and Fellaini 8 each as dem two get hand for both goals. While i go rate Rashford 6 for the dying minute goal wey e miss, wey for make am 3-1.