Manchester United bin lose 2-1 against Valencia for Champions League. The thing wey pass na the fact say Juventus bin also lose against Young Boys, so if say United for win, dem for top the group. Anyhow, i sha thank God say dem qualify for next round.
Make i rate the Red Devils players ontop how dem take perform vs Valencia:
Sergio Romero: E no sabi communicate with hin back-line. Na wetin cause that second goal. I rate am 4.
Phil Jones: E score own goal, na mumu. I rate am 2.
Eric Bailly: na average game e get. I rate am 3.
Antonio Valencia: E be like statue. E no dey cross again so e dey useless as right-back. I rate am 2.
Marcos Rojo: Na the worst for that back-line. Hin wing leak like pure water wey get hole. I rate am 1.
Fred: This guy na average player jare. E do rubbish as usual. I rate am 2.
Maroune Fellaini: Na hin worst game in United shirt. I rate am 2.
Paul Pogba: E miss clean chance for first half. E no lose ball, e no waste time with ball, e keep am simple but e no dey outstanding. E try small for second half. Na 4 i give am.
Andreas Pereira: With wetin e play against Valencia, e go roast for bench. Although, e play pass Fred. I rate am 3.
Juan Mata: E fall my hand jare. I rate am 3.
Romelu Lukaku: E dey play football with Timberland boot. I rate am 2.
Na 6 i go give Ashley Young, Marcus Rashford and Jesse Lingard.