Na one of the best Manchester United games wey i don watch since wey Sir Alex retire. Na the first time wey the Red Devils don score five Premier League goals since Sir Alex’s last game in charge. The people wey score for the Reds na Marcus Rashford, Ander Herrera, Jesse Lingard (2x) and Anthony Martial. Our next game na against Huddersfield on Wednesday.
Anyhow, make we talk about the five things wey we observe for this game:
The first thing wey we observe na say Manchester United don dey play sweet attacking football. If say na under Mourinho, United for don go defend when the scoreline be 2-1, but as e don pack hin load commot, the Red Devils bin attack from start till finish. Na how dem manage take score five goals today. If i go dey honest, e suppose end 7-1.
The second thing wey we observe na say Man United dey close their opponents down quickly and dem dey play with intensity. When Mourinho bin dey around, the players dey defend very deep, so dem no dey close opponents down early, dem go wait make dem bring the ball come our box, like say dem wan dash dem goal. Today, i like as the United players take close Cardiff down early, e make brain. E confuse Cardiff. Dem also play fast game (attacking ball).
Another thing wey we observe na say our defenders bin dey very solid today. The best out of all of them na Victor Lindelof, na him wey impress me pass. But the rest try o. Even Phil Jones wey be calamity, step up today and e bin get shot on target. The goal wey dem score, na gift from Rashford, no be say dem play well.
Another thing wey we observe na say the players dey play with freedom. Before today, Martial no dey make hin attacking runs, and e no dey dribble opponents too much. Martial bin dey keep am simple because e dey fear wetin Mourinho go do am. Today, the kind confidence wey e play with, e go dribble, if e no work, e go try again as fear no dey hin body. Paul Pogba self bin play with freedom, na how e manage take get two assists.
The last thing wey we observe na say Manchester United start in the right direction but enough work dey to the done if dem wan revive their Premier League season as e still dey inside gutter. Make we dey see sha, if dem fit continue like this, dem go rise for table.