Na great joy dey my mind as i dey write this article. Wetin cause am? na because Manchester United don win six games in a row since wey Ole Gunnar Solskjaer become caretaker boss.
Today match get as e be but i go thank God for the three points, Spurs wan kill us with chance after chance. Na big win for United as dem don dey level on points with Arsenal on 41 points. Make we talk about the five things wey we observe for the game.
The first thing wey we observe na say Manchester United bin play different today. For their previous PL games under Ole, dem attack wella, but today, dem do counter-attack for first half. For second half, na the usual Jose Mourinho defensive tactics wey dem play. Their first half performance dey oustanding, dem mess up for the second 45 minutes but De Gea save them today.
The second thing wey we observe na say David de Gea na the best goalkeepeer for this world. Earlier this season, fans bin dey doubt am as e bin concede many goals. But as e manage keep clean sheet today, e sweet my belle. The thing wey dey good about hin cleen sheet, na the fact say e make 11 saves for second half. If no be for am, United for don lose this game like 4-1 or 5-1.
Another thing wey we observe na say Harry Kane bin dey bully Phil Jones but na luck save United. On any other day, Kane for don score as e bin leave United defender Phil Jones for gutter on many occassions, but na luck no dey hin side. For this match, Jones be like hin junior brother as Kane just dey win everything against am (Header, sharpness,etc)
Another thing wey we observe na say Paul Pogba don continue hin superb form under Ole Gunnar Solskjaer. Even Rashford self dey on mad form. That Goal wey Rashford score na world class finish, but the pass from Pogba na ‘Out of this World’.
The last thing wey we observe na say Manchester Unite fit finish top four. Their next game na against Brighton for Old Trafford. If dem win am, dem go move closer to Chelsea as i get believe say Chelsea and Arsenal go end draw.