Manchester United don keep their top four hopes alive after dem knack Leicester City 1-0 on Saturday. The person wey score the goal for the Reds na Marcus Rashford after Paul Pogba fling one sweet ball for am. Manchester United dey fifth position now on 48th points, dem dey two points behind Chelsea.
The next game wey United get na against Fulham for Saturday next week. Till then, we wan talk about the five things wey we observe:
The first thing wey we observe na say Manchester United no play well today. Na Leicester play pass but dem no make the best use of their chances. For some of their chances, i think say na goal but somehow, dem miss am, like that chance wey Evans miss when e kick air. Las las i thank God for three points.
Another thing wey we observe na say Manchester United attack no shine today. Inshort, apart from the opening stages, dem no try. After Rashford score, e just be like say we lock shop. Our second half even worse pass, Apart from the chance wey Lukaku and Martial miss for second half, i no dey sure say we see any good chance.
Another thing wey we observe na say e be like say goals don dey dry up from Ole Gunnar Solskjaer’s United side. When Ole first come, United dey demolish everybody, but now, dem dey drag wins. I no go complain as three points na the koko. But i dey pray make the goals galore come back.
Another thing wey we observe na say Manchester United bin struggle for midfield against Leicester. For second half, Leicester bin collect midfield for our hand. For this game, we bin see the best and worst of Paul Pogba but i thank God say the best outshine the worst.
The last thing wey we observe na say David de Gea don silence hin critics once again, as na him important saves wey preserve United three points