The game wey Manchester United bin get against Liverpool bin end 0-0. The game get as e be, make i no lie as injuries wan finish the Red Devils. Right now, Matic, Herrera, Mata and Lingard dey injured. The Reds don drop down to fifth position after Arsenal knack Southampton 2-0.
Make we sha talk about players report card:
David de Gea: Na silent day at the office for am as e no need to make any save. Our midfield and defence block everywhere. 5
Luke Shaw: Na the Man of the Match for me as e dey everywhere, e no allow Salah to play hin game, sote Klopp vex, remove Salah when the bully become too much. 10
Ashley Young: Na only once in the game wey Mane bully am, for first half but all round, e put the guy inside hin pocket. 8
Chris Smalling: Hin partnership with Lindelof na the real deal. Dem no dey give opponents any chance at goal. 9
Victor Lindelof: As usual, hin display dey outstanding. 9
Scott McTominay: At first when i hear say Matic no dey, i bin dey afraid as i no sabi if McTominay go cope with the pressure. To my surprise, e cope with am well as e play calm game, e no panic. 7
I no fit rate Herrera, Mata and Lingard as dem no tey ontop pitch before dem injure.
Pereira: E play well today, e keep am simple. I dey proud of am. E chase every ball. 7
Paul Pogba: This guy shock me today, e dey everywhere. E help for attack and e also get plenty defensive roles as Herrera and Matic no dey, e do am well. E chase every ball down like say na do or die affair, dey make sliding tackles with passion. E try. 9
Romelu Lukaku: Na him wey create the most chances for Manchester United today. Infact, na him create wey create the most chances ontop pitch, as e create more chances than Liverpool players. E for don get assist if Smalling or Lingard bury their chances. I rate am 8.
Marcus Rashford: E no too play well today but na the injury cause am. Also, e bin dey stingy today. Anyway, I go praise am for hin determination to carry on as e no easy to play with wound. 7