The Red Devils don get back to wining ways after dem knack Crystal Palace 3-1 for their own backyard. The people wey score for the Reds na Romelu Lukaku (2x) and Ashley Young. Right now, Manchester United still dey for fifth as Arsenal bin knack Bournemouth 5-1. The only good thing na say Tottenham don drop points as dem lose 2-0 against Chelsea for Stamford Bridge. Like play like play, the race for fourth position don dey become race for third and fourth as Spurs na dead now.
The next game wey United get na against Southampton on Saturday. Meanwhile, Make we talk about the five things wey we observe for the game last night.
The first thing wey we observe na say Alexis, Lukaku, McTominay and Luke Shaw bin play very well but na Shaw wey we go hail pass as e transform to Anthony Martial for first-half against Palace. That hin assist to Lukaku make brain.
Secondly, Romelu Lukaku aka Big Rom don silence all hin critics as e score two good goals last night. Some bad belle people bin dey pray make e flop so dem go fuel their Lukaku Out agenda but e silence all of them. Out of hin two goals, na the first one wey i like pass as the precision na 100 percent.
Thirdly, I don finally agree say our best defensive partnership right now na Victor Lindelof and Chris Smalling. If no be for Ashley Young’s yama yama, United for don keep clean sheet. Baba wan dribble Zaha for defence but e con backfire. Las Las e redeem himself as e manage score United’s third goal.
Another thing na say Ole Gunnar Solskjaer don dey prove say him na the right man for the job. Right now, the Red Devils don win eight straight away games back to back. Na the first time wey e dey happen for United’s history. Also e dey live to tradition as e bin give James Garner hin debut last night.
Lastly, the midfield trio of Pogba-McTominay-Fred no bad like that but Fred na the weak link. McTominay fit man like shop while Matic dey injured but i dey pray make Herrera return sharply so e fit replace Fred for there, the guy never get hin balance yet at United.