Manchester United don get their worst game under Ole Gunnar Solskjaer after dem lose 2-1 against Wolves for FA Cup. No be the scoreline wey dey even vex most United fans, na the fact say the Red Devils play total rubbish. I fit talk say Wolves deserve the win as na dem play pass. Ole and hin men don jah from FA Cup sha, make we talk about the five things wey we observe.
The first thing wey we observe na say Wolves coach Nuno bin school Ole Gunnar Solskjaer from start till finish. The way Wolves take set up their team, United bin struggle to create chances. The goal wey United score na consolation goal self as e come for dying minute. E pain me say Ole no change hin tactics at half-time. If i go dey honest, na the first game wey the United boss flop tactically. I just dey hope make e no throw away hin chance to be United permanent boss because if e miss out on top four, dem no go give am. I believe say people don cancel am from winning Champions League.
Another thing wey we observe na say Manchester United attack no gel at all. Marcus Rashford, Jesse Lingard and Marcus Rashford no play shingbai. Dem no give Wolves defence trouble, dem just dey play the game like say e dey happen for their bedroom.
Another thing wey we observe na say United no wan be the hardest working team again after that PSG win. E be like say to beat PSG na goals now sote the whole team dey play relaxed like say dem don arrive. Back to back defeats don open their eye. If dem no step up, dem fit miss out on Champions League next season. For the Wolves goals, i go blame the whole team for being lazy.
Another thing wey we observe na say Manchester United midfield of Ander Herrera, Paul Pogba and Nemanja Matic no gel at all. E shock me as na wetin dey carry United when Ole first come. Since that Matic injury, e never get himself. Herrera self mess up last night and na Paul’s worst performance under new boss Ole.
Lastly, the Reds fit focus on the main task hand as dem don jah from FA Cup. The main task na to qualify for Champions League next season. Na either by winning the UCL trophy or finishing top three/four for League table.