Manchester United manager Ole Gunnar Solskjaer don run press conference ahead of hin side’s Premier League clash against Wolves on Tuesday night.
The Red Devils boss don provide update ahead of Wolves clash: “Our squad make brain, e good.”
Ole ontop say four United players don score pass 10 goals: “Na good thing o – as e no make sense if na only one person dey score all our goals. If many people fit score, e go give our opponents headache, as dem know say goals go come from left, right and center.“
Ole: “Martial go dey alright las las. Victor don dey train well so e go dey ready. Apart from them, Darmian and Bailly no dey. Valencia and Alexis dey injured.”
Ole: “If we wakka enter Wolves house and we no play well, dem go change am for us. The last time we face them, we no play shingbai. Even though we bin see 70 percent ball possession, we no take am do anything.”
Ole: “Paul na nice guy, e humble gan. The only thing wey e do na say e answer question ontop Zidane who be France icon, manager wey make brain, person wey sabi ball gan. Pogba no do any harm.”
Ole: “Paul dey happy here, and e dey part of my plans big time as i go build the team around am, i no fit change my mind.”
Ole: “E go make brain if we dey Champions League next year and we don put ourselves for good position. We gats enter the last seven games with ginger, like say we dey ready to kill anybody, we no get anything to lose.”