For the first time, we fit talk say Ole Gunnar Solskjaer fumble tactically. E shock me but na wetin happen as Barcelona demolish United 3-0 with goals from Messi (2x) and Coutinho. Like play like play, the Red Devils don jah from FA Cup and Champions League, so na to focus on top four battle. Na big shame if dem also miss out on top four.
Make we talk about wetin we observe for the Barca vs United game:
Firstly the United manager, Ole Gunnar Solskjaer fumble tactically (with hin starting XI), then e con mess up substitution wise. No be today we don dey complain about hin poor decision making when e wan substitute players, e dey make changes like say e no dey read the game at all. But today na the first time e fumble tactically, as that starting XI no be am at all. You wan play Barcelona and you dey start Jones, Young, Martial and Lingard. Then Lindelof con play right-back. Lukaku wey help you for Paris, you leave am for bench. Then who wan score?. This match don open my eyes to the fact say Ole dey favour some players over others (favoritism) especially English players. Else i no sabi why Lingard wey don dey poor for one whole month, go start ahead of Lukaku. If Ole wan last long at this job, e gats improve tactically and substitution wise.
Secondly Ashley Young and David de Gea fumble as dem dash Barcelona easy goals. Ball wey Young suppose clear or pass since, e go dey dribble hin village people, till Barcelona mark am, go score. That second goal, na De Gea fumble. If we go dey honest, the Spaniard don mess up this season. E don cost us, more than e don save us. But make we no sell am o, e fit improve next season. As for Ashley Young, that one don cost us almost every game and e no add value this season. Make we offload am.
Another thing wey we observe na say Manchester United bin give up too easily. The players moral bin change once that second goal enter. Even Ole no believe say we fit come back as e no make changes at halftime. All na error jare.
Another thing wey we observe na say Manchester United gats spend like £350m when summer reach as the current squad na below average. Martial no be proper LW and e no dey consistent, Rashford no fit be our main striker, England just dey overate am. Then Lingard na below average, this season e be like Obertan.
The last thing wey we observe na say Manchester United fit miss out on top four if them no fix up. Both Ole and hin players gats receive sense or na Europa things.