Manchester United manager Ole Gunnar Solskjaer don provide update ontop the Premier League clash wey hin side get against Huddersfield Town. The Red Devils gats win this game even if e no go guarantee Champions League place as dem go dey pray for Tottenham, Chelsea and Arsenal to lose. Make we dey see sha.
Ole: “We don miss most of the chances wey we don create. When i first wakka enter here, we dey score up and down but now we dey waste chances. We don dey work ontop creating chances and scoring.”
Ole: “Right now, my strikers dey do extra shift, dem dey practice extra crossing, extra finishing so their moral fit rise. We dey try make dem feel good again so dem go bang in goals.”
Ole: “De Gea go play again? Ehen now. Romero don injure self so e no train yesterday, e don break hin knee. De Gea don dey train well this week.”
Ole: “De Gea don try this season but now wey season wan end, e dey enter headline for the wrong reasons. I believe say e go deal with am, but our goalkeeping department make brain with Emilio, Sergio, Lee and David, men wey sabi.”
Ole: “I no gats tell everybody wetin me and De Gea dey discuss for private. The only thing wey i know na say De Gea’s moral don high and e dey look forward to our last two games. E wan prove himself. With the kind performances wey e don show for the past two years, i believe am gan.”
Ole: “Martial sabi score goals now, the koko na make we move forward sote we go bring out the beast in am. E sure me say e go score plenty goals for United in the future.”