Manchester United don win another pre-season game as dem beat Inter Milan 1-0 for Singapore. The person wey score the only goal for the game na Mason Greenwood for second half. We dey happy with the result as many positive things bin happen for the game.
Before we talk about the five things wey we observe for the game, hope say You don register for MUIP FPL as na N500,000 dey up for grabs?
The first thing wey we observe for the game na say United play well for both halves. Dem worry Inter defence wella, e shock me say e no end like 3-0. The only thing na say people like Martial and Lingard gats improve their finishing. We wan hail Mason Greenwood for hin super finish, e be like Van Persie. We also wan hail Chong as e bin dey sharp when e come on.
Another thing wey we observe na Manchester United’s defence bin dey very solid. The person wey try pass for that defence na Wan Bissaka, na why e win Man of the Match self. Hin tackles dey burst my brain, e dey clean and e dey block road.
Another thing wey we observe na say Manchester United don get serious headache as dem no sabi whether to give chance to Tuanzebe or whether dem go sign Maguire from Leicester. If una go ask me, me self go dey confused. Make we dey see sha.
Another thing wey we observe na say Daniel James bin struggle for right-wing and e go give Ole serious headache as all hin wingers wan play LW, nobody wan dey for right. If James sabi wetin dey good for am, make e go learn how to play right position or e go chop bench tire.
Lastly, we believe say if United sign Bruno Fernandes, dem go challenge for Premier League title. Especially if dem no sell Lukaku. That Lukaku na asset wey Ole fit use against teams to get goal.