I bin know say Man United go beat Chelsea but i no know say e go be 4-0 as na 2-0 wey e show me. Anyway, i go accept am. The people wey score for United na Marcus Rashford (2x), Anthony Martial and Daniel James. E sweet me say James bin score on hin debut.
Before we talk about the five things, we hope say una don register for MUIP FPL competition as N500,000 dey up for grabs. The deadline for registration na Friday, August 16th.
So make we talk about the five things wey we observe:
The first thing wey we observe na say Manchester United struggle when the game start but as the game con settle, the players con grow into the game. Chelsea bin knack bar twice, if say those balls enter, the game for dey different but we thank God say e no enter. All round, we dey happy with the performance.
Another thing wey we observe na say Manchester United get midfield problem and na real cause for concern. We hope say Pogba go dey on top form because if e injure or hin head begin touch, we go get wahala.
Another thing wey we observe na say Man United bin dey play counter attack like say we dey Sir Alex Ferguson era. After Martial score ehn, i no even siddon yet, Pogba con spread pass from Ghana to Nigeria, wey Rashford use score. E sweet my belle.
The fourth thing wey we observe na say Manchester United defence na the real deal. Harry Maguire and Wan-Bissaka bin play like say dem don dey Man United for many years. This team go keep plenty clean sheets this season.
The last thing wey we observe na say the season go strong but Man United go battle for top three. Make we dey observe for now sha.