Manchester United manager Ole Gunnar Solksajer don run hin press conference ontop the Premier League match wey Manchester United get against Leicester City on Saturday.
The Reds Devils no start the season well as na only one win wey dem don get in four games, against Chelsea but the Reds boss believe say dem fit turn things around. The biggest problem na say some first team players don woundjure and dem go miss the clash.
Ole: “We no really sabi the people wey fit play and the ones wey don woundjure. Maybe Aaron, Jesse dey out as dem pull out from their international teams.”
Ole: “I wan make David remain here o, e know am self and to me, David na the best goalkeeper for this world. We don see the best of am, and we dey pray make e finish hin career at United.”
Ole: “The club don dey yarn contract matter with David and we hope say e go sign.”
Ole: “Pogba no go dey fit. Except if na God wey heal am last night, From wetin i don see, e no fit do 100% training.”
Ole ontop Maguire: “The guy don try so far. E don come our dressing room and e be leader. E dey command our men ontop pitch. For me, e go sweet am to play against hin old team.”
Ole: “Daniel James? E no shock me, The guy dey shine since hin first game for United. Make una dey expect more from am, e get that X factor with hin pace. E go cause trouble.”