Manchester United don get back to winning ways after dem beat Leicester City 1-0. The person wey score the only goal of the game na Marcus Rashford. We dey look forward to the next game but make we talk about the five things wey we observe:
Firstly, the United defence dey solid. The players wey we sign this summer, Wan-Bissaka and Harry Maguire don improve our backline. Them two try wella today. Even Ashley Young play well.
Secondly, Man United no play well attack-wise today. After that Rashford’s goal, dem no play shingbai. We no create enough chances but as our defence try, we collect 3 points. Na God save us.
Thirdly, Ole bin try tactically today as hin changes bin impact the game. Tahith Chong and Fred bin carry ginger enter pitch when Leicester dey worry us. Their high pressing bin almost give United second goal.
Another thing wey we observe na say the Red Devils no get pattern of play. From everything wey we don observe so far this season, nothing like United DNA exist. Our only pray na say the youths for United go break into the first team.
Lastly, enough room dey for improvement. We no believe say this team fit finish top four. Hopefully, dem go change our doubts.