Manchester United don get their first away win in 12 games as dem beat Partizan 1-0. The person wey score for United na Anthony Martial, with penarity. This na one of the worst United matches this season, but we no go focus on am too much as we dey play against Norwich this weekend.
Make we talk about the five things wey we observe:
Firstly, we dey suspect say Ole and hin United players no dey train as their performance against Partizan dey horrible. Na only two games wey United don play well this season (vs Liverpool and Chelsea). Ole gats dey publish training footage.
Secondly, our attack no work at all today. Martial be like vanishing spray, if no be for the penalty, e for no score self as na the only shot on target we see for the game. Jesse Lingard play one shot wey knack post sha.
Thirdly, our youth boy James Garner bin struggle tonight but we no go blame am as e dey play beside mumus. Last Last, we go thank God for the 3 points.
Another thing wey we observe na say Sergio Romero bin save United tonight. If say Partizan for equalize, this Ole’s team no go fit score another goal as their pattern na to score one goal and defend till match finish, na shame.
Lastly, Ole Gunnar Solskjaer no get game plan. That hin United DNA talk na the biggest scam post Sir Alex. The energy wey Man United dey use play this season dey dependant on their opponents. If United dey play top teams, dem go raise their game to PLAY WELL. But If United dey play small teams, dem go lower their standards to PLAY LIKE MUMU.