Na Park bin represent Man United for the UEFA draw for last 32 of Europa League as Solskjaer side go face Club Brugge.
Manchester United ambassador Park Ji-Sung believe say club go make January signings but con play down dem impact on the club progress for Europa League this season.
United dey keen to strengthen for the upcoming January window, particularly for dem forward positions as Norwegian striker Erling Haaland be one of dem top targets.
Ole Gunnar Solskjaer dey under pressure to ensure say United qualify for next season Champions League — either say hin go finish for Premier League top four or say hin go win Europa League.
And after dem draw United against Club Brugge for the last 32 of the competition, club ambassador and former player Park yarn update on the January transfer search.
When BT Sport ask am whether United dey focus on league or European competition, he yarn say: “Still we get both possibilities, so we no wan just focus on one competition. We gats follow this two tracks as far as we fit.
“E depend on January transfers, e depends on wetin the manager want and wetin the club fit produce. Signings go dey, but e no matter how many we get, the koko be how the team fit progress.”
Park con react to the draw,wey see United face Belgian outfit Brugge after dem qualify through dem group as winners.
“Easy team no dey for this stage [of the competition] so gats prepare well,” hin add.
“These days, the team dey do well, so hopefully we fit get good result.
“A couple of years ago we win the trophy and we know how beneficial e be, direct qualification to Champions League.
“And this competition no be easy competition and particularly young players fit get experience as dem dey go through.