The Red Devils don get back to winning ways after dem knack Newcastle 4-1 for Old Trafford. The people wey score for United na Anthony Martial (2), Mason Greenwood and Marcus Rashford. While na Longstaff wey score for Newcastle.
We wan talk about the five things wey we observe for the game as Man United dismantle Newcastle.
Firstly, Manchester United bin start the game poorly as dem concede to Longstaff’s goal early but e con ginger them to fight back. The Reds bin attack with pace today, na how dem manage score their goals. We also wan hail Mason Greenwood for hin sweet strike, na one in a million.
Secondly, the Red Devils bin dominate the game totally for second half. E sure me say Newcastle no touch ball reach 20 times. Na so dem frustrate sote dem con dey beg make ref blow whistle. We also dey happy because Paul Pogba bin play 45 minutes but we dey sad as Scott McTominay don injure.
Also, we wan commend Manchester United defence today. Even if dem dey shaky for the opening stages, later, sense con enter their brain as dem lock shop. Aaron Wan-Bissaka self get assist, e sweet me.
Also, Manchester United strike force dey clinical today. The whole front three score today. Mason Greenwood wan use style collect Starting Position from Daniel James. The boy too sabi.
Lastly, Manchester United don re-enter back into Top Four race as Chelsea bin lose 2-0 vs Southampton. We hope say the Reds fit win their next game. Moral don rise after this win.